Prins Laurens I
Alaaf minse van Mieve en Roy
Wat ein topjaor vier Èlekòm, aanne kop stuun mèt de voetbalploog en ich nùuw verkuuze es 46ste Prins vanne Heikiesèters, ich kan het nog néét geleive, bedankt hiej vier, manne vanne Raod van Elf.
Ich zal mich effe vierstèlle : Laurens Cupers, gebure op 10 december 1994 en núuw samenwunend met miene sjat Joyce. Samen met uis dochter Finne en plusdochter Emily wuune vè inne Sjaolstraot 71 in Èlekòm. Ich bin eigelik aafkòmstig uut Gink en gruut gebracht inne café want uis ma hèèt al mier dan 25 jaor café in Winterslag, ge zeet dao altied welkòm.
Vier de kost wèrk ich es technieker bie de wuunzorgcentra van Vitas vanùut Pèèr.
Carnaval zit al sins lang in mien blood, Tja, este gruut gebracht bèst inne café is die kans al wat gruter. Ich bin namelik uich lid vanne carnavalvereniging Het Garnizoen in Gink, mer nùuw ich Prins vanne Heikiesèters bin gewure hèèt dit nateerlik absolute vierang gekriege. Om miene vrieje tied volledig op te vulle bin ich uich nòg trouwe fan van KRC Genk, bin ich bekans wèkeliks te vinne oppe sjeetclub Mikpunt in Maasmechelen en zeen vè uich neet vies vanne bitske modder es vè geliek met uis jing oppe quad guun rieje.
Zuu, vierleipig wèt ge genoeg iever mich. Wat gè echter néét mocht missen is nateerlik uize 41ste carnavalstút op zonnig 23 miert. Ge zult de jing weer gruute vliezen moote met gève òm alle sloek in te doon. Òm det allemaol te koene bekostigen kimt wie elk jaor de sjetterie van Èlekòm rond met stikkers. Vier 3,00 euro, nateerlik allein vier de gruute minse, steunt ge de carnaval en koene vèè weer e potje aanleige zuu det de jing volgend jaor weer eine gruute huip sloek koene rape. Ich wil uich nòg wat reklaam maken vier de kinnercarnavalstút op vriedignaomiddig 21 miert in het centrum van Mieve. De jing zullen het fijn vinne es ge dao uich kwaamt kieke.
Om 14u11 stipt beginne vèè er weer aan met start oppe Ginkerbaan. De oemluip is dezelfde es vierig jaor, op het leste blaad van deze folder kònt ge zeen buu det er ieveral langs kimt. Het begint weer met eine reklamestuut, es ge nòg interesse hebt om met te doon, tis gratis en vier niks mer vèè vraoge waal det gè oech effe aanmeldt op uize site: deheikiesetersmeeuwen.com.
Zuu rap de stùt binne is trèk ich met de ganse Raod van Elf weer langs alle cafés van Mieve. Ge zéét allemaol úutgenuudigd òm met uis met te guun op deze kroegentocht. En maondig is er weer gratis lekkere hiering te kriege in versjillende cafés in Mieve.
En met de goeje raod: “ blieft vieral vèèl lache want tis beweeze det ge vier te lache vèèl minner spiere moot gebrieke es vier leelik te kieke” zal 23 miert weer eine onvergètelike huugdaag zeen in Mieve.