Prins Jordy I
Alaaf minse van Mieve
31 januari 2026, dèèn daag zal ich nuuts vergète, toon hemme de manne vanne Raod van Elf mich aangestèld es 47ste Prins vanne Heikiesèters, bedankt hiej vier, manne vanne Raod van Elf, ge zult er geine spiet van hemme.
Ich zal mich ierst effe vierstèlle : Jordy Theuwissen, gebure op 10 augustus 2002, zuun van Koen van Tinus van Door Vanhoof en Sabine van Jefke Lips. Ich hem uich nòg ein jònger broer Robbe en ein ouwer zuster Mirthe. Jóng vrouwlie, haalt oech mer niks in oere kop oem eine Prins aanne haok te sluun, want ich hem aal ein vriendin Lesley. Vierluipig wuun ich nòg thuus bie mien ouwers in de Mèrelstraot nr. 12 mer dao kimt misjien verannering in nao dit carnavalsezuun.Vier de kost wèrk ich es verwermingstechnieker bie de firma Cevecom in Èlekòm.
Carnaval is zièker ni nuw vier mich want ich bin uich al jaore lid vanne carnavalsvereniging de Partycrachers en toon ich klein waas ging ich al kieke nao carnavalstutte. De manne van de Partycrachers zullen mich dus dit joar wat mote misse, mer ich dink waal dèt ze fier zéén núuw ich Prins gewure bin. Nòg ein klein anekdote : toon ze mich vroge vier Prins te wère dacht ich ierst dèt dit vier 2027 zuuw zéén, mer good det ze mich det nóg op tied hemme laote wiète, anners waas er geine Prins gewèèst in 2026.
​
Vreeger hem ich nóg volleybal bie Èlekòm gespèèld, nuuw zéén mien gruutste hobbies 4x4 rieje, ich hem zelfs gehierd dèt er bie de Road van 11 nog ein paar zéén die det es hobbie hemme, dèt wèrt nog plezant dan. En vier e wiekènd snowboarden maak ich uich gèr tied.
​
Zuu, vierleipig wèt ge genòg iever mich. Wat gè echter néét mocht misse is nàteerlik uize 42ste carnavalstút op zonnig 8 miert. De sloek zal weer met gruute heip duur de locht vlege, bring mer gruute vlieze met. Òm det allemaol te koene bekostigen kimt wie elk jaor de sjetterie van Èlekòm rond met stikkers. Vier 3,00 euro, nateerlik allein vier de gruute minse, steunt ge de carnaval en koene vèè weer e potje aanleige zuu det de jing volgend jaor weer eine gruute huip sloek koene rape. Ich wil uich nòg wat reklaam maken vier de kinnercarnavalstút op vriedignaomiddig 6 miert in het centrum van Mieve. De jing zullen het fijn vinne es ge dao uich kwaamt kieke.
Om 14u11 stipt beginne vèè er weer aan met start oppe Ginkerbaan. De oemluip is dezelfde es vierig jaor, op het leste blaad van deze folder kònt ge zeen buu det er ieveral langs kimt. Het begint weer met eine reklamestuut, es ge nòg interesse hebt om met te doon, tis gratis en vier niks mer vèè vraoge waal det gè oech effe aanmeldt op uize site :
deheikiesetersmeeuwen.com.
Zuu rap de stùt binne is trèk ich met de ganse Raod van Elf weer langs alle cafés van Mieve. Ge zéét allemaol úutgenuudigd òm met uis met te guun op deze kroegentocht. En maondig is er weer gratis lekkere hiering te kriege bie Rob in de Mood.
En met de goeje raod : “ blieft vieral vèèl lache want tis beweeze det ge vier te lache vèèl minner spiere moot gebrieke es vier leelik te kieke” zal 8 miert weer eine onvergètelike huugdaag zéén in Mieve .
Alaaf, Alaaf, Alaaf