Prins Kristof I

Prins Kristof I - Heikiesèters

Alaaf minse van gruut Mieve-Roy

 

Miene pa hèèt e paar jaor gelieje het vierbeeld gegève en mich waterechtig gemaakt en nuuw bin ich blie det ich de 43ste Prins vanne Heikiesèters van Mieve mag zéén: KRISTOF I. Ich zal mich effe vierstèlle : Kristof Luyten, uich bekind es de Witte, zuun van Rina en Jean van Tuun Vaosen. Ich hem uich noeg 2 broers, Kevin en Bjorn mer ze hemmen nateerlik de sjuunste uitgekuuze oem Prins te wère.

Ich wuun noeg bie mien auwers op e Broekkant 49 in Mieve. Es ge de foto bekiekt dinkt ge nateerlik det is noeg e joenk piske, mer de week nao de stuut op de 21ste miert wèr ich toch al 37 jaor. Ein vaste vriendin hem ich op dit uigenblik néét mer laot oech niet tiegenhauwe, vruilie, miene GSM-nummer is 0477/606891.

 

Vier de kost wèrk ich vieral met korte opdrachten, momenteel bin ich aan het werk bie Drankenhandel Domen in Bree, nao de stuut begin ich bie den achterste moller, want dan hemme ze han tekort oem alle maïs verwerkt te kriege en aaf en tuuw is de Belgische Staot miene werkgèver, het betaalt néét good mer het werk is uich néét zuu zwaor.

Hobbies hem ich vèèl, thai-boeksen, badmington, kaarten, keigelen in de Mood, soems voetbal ich met uis Clubke en ich bin uich garçon op eroticabeurzen in het hiele land. Riegelmaotig e pintje drinke en ins lekker guun èten slaon ich uich nuuts aaf. Mer wat mich héél zieker in het blood zit is reizen. Ich hem al vèèl len bezocht mer Japan en Rusland stuun nuuw buuvenaan op mien bucket-liest. Noeg ein hobbie van mich, dèè ich zieker néét maag vergèten is alles vezamelen wat te maken hèèt met sigaretten en tubbik, dus es ge éét hebt hievan det ge kwiet wilt, gèèf mich mer e seintje, dan sprèng ich ins binnen.

Zuu, nuuw wèt ge al wat mier iever mich. Wat ge echter néét mocht missen is nateerlik uize 39ste carnavalstuut op zonnig 15 miert. Chips, keekskes, mars, twix, bounty , milkay way giem, wafelkes guun oech weer oem de uure vleege. Oem det allemaol te koene bekostigen kimt wie elk jaor de sjetterie van Ellekoem roend met stikkers. Vier 3,00 euro, nateerlik allein vier de gruute minse, steunt ge de carnaval en koene vè weer e potje aanleige zuu det de jing volgend jaor weer eine gruute huip sloek koene rapen.

 

Oem 14u11 stipt beginne vè ter weer aan met start oppe Ginkerbaan en de oemluip is krek dezelfde es verlieje jaor. Het begint met eine reklamestuut en dè is wie altied gratis en vier niks, zuwaal zelfstandigen van Mieve es van anner gemeinte koene zich gewuun ter plaatse aanmelden op zonnig 15 miert.

 

Es de stuut binnen is zal ich met de ganse Raod van Elf de cafés in Mieve guun bezeeke. Ge zéét allemaol uitgenuudigd oem met uis met te guun op deze kroegentocht. En maondig isser weer gratis lekkere hiering te kriege in versjillende cafés in Mieve.

 

En met de goeje raod : “ blieft vieral vèèl lache want tis beweeze det ge vier te lachen vèèl minner spiere moot gebrieke es vier leelik te kieke” zal 15 miert weer eine onvergètelike huugdaag zeen in Mieve .

G.K.V. De Heikiesèters

p/a Rob Schouteden

Weg naar Helchteren 59 3670 Meeuwen-Gruitrode

+32(0)488 49 93 24

rschouteden@hotmail.com

  • Grey Facebook Icon

© 2017 by G.K.V. De Heikiesèters Meeuwen-Gruitrode. Proudly created with Wix.com